Almanach romand «Mess zoppegiant»

Il 18avel tschientaner ha il Chalender dal Mess zoppegiant fitgà pe en il chantun Vad e vala dapi lura sco chalender il pli vegl da la Svizra. Il «Véritable messager boiteux de Berne et de Vevey» è cumparì enfin ussa senza interrupziun dapi l'onn 1707. Quel porscha als Romands anc oz in chalender unic per la lavur sin il champ ed en iert, cun las datas da las fieras regiunalas da martganzia e da muvel e dals martgads emnils e cun in oroscop. Ultra d'ina glista da las autoritads, da las tariffas da posta e dals stadis da quest mund chattan ins er blers raquints e rapports divertents e serius. Ils texts scrits en il dialect dal Vad, la perspectiva precauta sin l'ir dal mund e las prognosas da l'aura (che sa basan sin las observaziuns d'in uvestg da Bamberg dal 17avel tschientaner) furman uschia ina maschaida dal tuttafatg unica. Quest mess è ina publicaziun da temps passads che na tema betg il contact cun las empermischuns da l'avegnir e ch'ans demussa la finala quant constanta che la natira è en congual cun la pitschnezza da nossa existenza terrestra. Il chalender vegn vendì ad ingiant sin ils martgads d'atun ed è per ils vairs Romands bler dapli ch'in cussegliader pratic u ina part da la folclora, numnadamain in'agenda empernaivla e famigliara ch’als collia fermamain cun las ragischs da l'istorgia purila da lur regiun.