La cursa da skis Inferno è vegnida manada tras per l’emprima giada ils 29 da schaner 1928 ed è uschia ina da las pli veglias cursas da skis che vegnan manadas tras anc oz e la cursa d’amaturs la pli gronda dal mund. Fin l’onn 1965 muntavan las participantas ed ils participants la saira avant la cursa davent da la staziun da muntogna Allmendhubel (1907 meters sur mar) fin a la chamona da skis dal club da skis da Mürren (2432 meters sur mar) en l’Engetal. L’autra damaun vegniva surmuntà la davosa etappa fin al Schilthorn. Dapi l’onn 1968 maina la pendiculara fin al piz dal Schilthorn. Oz è il dumber da las participantas e dals participants limità a 1850 persunas e mintga onn ston vegnir refusadas plirs tschients persunas. Per gronda part vegn tratga la sort per determinar tgi che po prender part a la cursa. Il percurs, ch’ins dastga duvrar er ordaifer la cursa, ha oz ina lunghezza da 14,9 kilometers ed in profil da 2170 meters d’autezza. Talmain attractivs è el pervia da sia topografia zunt variada. Realisada vegniva la cursa ditg dals dus clubs da skis da Mürren e da Lauterbrunnen. Oz organisescha l’uniun «Internationale Inferno-Skirennen Mürren», fundada l’onn 1999, las occurrenzas da l’emna Inferno, e quai cun il sustegn da 200 fin 300 funcziunarias e funcziunaris en uffizi d’onur ch’appartegnan per gronda part als clubs da skis locals.
La cursa da skis Inferno è da gronda impurtanza per la regiun Lauterbrunnen ed oravant tut per il vitg Mürren che ha survegnì uschia in renum internaziunal. Durant tut ils onns da sia existenza ha la cursa mantegnì sia essenza ed è restada ina cursa da skis populara appreziada. En l’istorgia dal sport da skis è la cursa da skis Inferno in eveniment central – per la regiun è ella ina tradiziun fitg viva.
