Dar platta stetgel


Sparta:
Praticas socialas
Chantun:

Descripziun

Dar platta stetgel è in vegl sport da trair che vegniva gia pratitgà en il temp medieval en bunamain tut ils territoris da la Svizra – saja quai sco passatemp u sco concurrenza. Quest sport ha blers nums: Blättlen, Stöcklen, Tötzlen, Jouer aux couthions, Jeu de la quille, Cavalière, Giovar a plattas, Igl stickel, Platta stechel e.u.v. Oz vegn questa disciplina – en il fratemp unifitgada – cun ritga tradiziun pratitgada bunamain mo pli en il chantun Berna. Cun dar platta stetgel vegn in object, che vegn numnà platta, bittà en direcziun dal stetgel (final). La distanza da trair importa tant per il umens sco per las dunnas 17 meters. Il final consista d’arschiglia ed ha in diameter dad 1,4 meters. Entamez è fitgà in bastun da fier (bastun) d’ina autezza da circa 40 centimeters ch’è inclinà levamain vers davant. Mintga giugadra e mintga giugader posseda sia atgna platta che giascha bain en ses maun. Ella consista d’atschal temprà, en general en furma da maun ed è dentada. Sch’ella tutga il bastun, obtegna la bittadra u il bittader 100 puncts. Pli lunsch davent dal bastun ch’ella sa chatta, pli paucs puncts ch’i dat.

Pli baud era dar platta stetgel plitost in sport per ils paupers. Oz vegn el dentant pratitgà da funcziunarias e funcziunaris, dad interprendidras ed interprendiders, da mastergnantas e mastergnants, da puras e purs – pia da persunas da differentas classas socialas. Ils gieus ils pli vegls havevan mintgamai lieu a chaschun d’inscunters sin pastgiras e sin alps, nua che glieud d’omadus sexs sa scuntravan per far differents gieus. Oz vegn dar platta stetgel tgirà en 47 uniuns activas principalmain en il chantun Berna. Però a quest sport manca la generaziun giuvna. Dar platta stetgel n’è betg in sport facil, el dumonda concentraziun, ina buna controlla dal corp e buna cundiziun.

Gallaria d'illustraziuns

  • 100 puncts, la platta tutga il bastun ©tholu/Platzgen.ch
  • Mesiraziun da la distanza per la valitaziun ©tholu/Platzgen.ch
  • Las plattas ©tholu/Platzgen.ch
  • Il nov logo da la federaziun platzgen.ch dapi l’avust 2017 ©tholu/Platzgen.ch
  • Campiunadi da la federaziun cun ina culissa imposanta a Leissigen (2014) ©tholu/Platzgen.ch
  • In victur da seria «pli giuven»: Martin Bachmann, Platzgerclub Steffisburg-Stutz, en acziun al campiunadi a Utzenstorf ©tholu/Platzgen.ch
  • Trio da victurs a chaschun da l’emprim campiunadi svizzer: campiun svizzer Reinhard Oppliger, Martin Bachmann sin la segunda plazza e Beat Jenni sin la terza plazza (Utzenstorf, 27-8-2017) ©tholu/Platzgen.ch
  • Monika Leibundgut dal Platzgerclub Belp è stada la «mesira» en la categoria da las dunnas a la festa da la federaziun l’onn 2011 a Neuenegg e valeva sco praticamain insuperabla; la stagiun da l’onn 2015 è la categoria da las dunnas vegnida schliada e Monika Leibundgut tira oz en la categoria dals umens ©tholu/Platzgen.ch
  • Dar platta stetgel en moda passiva al Platzgerclub Ursprung-Bamberg (29-7-2017) ©tholu/Platzgen.ch

Referenzas e dossier

Publicaziuns
  • Christian Zimmermann: Platzgen – eine Wurfsportart mit Geschichte. Ittigen, 1998

  • Christian Zimmermann: Das Platzgen im Kanton Bern (www.platzgen-be.ch/home/platzgen.htm, 20.8.2017)

  • Johann Baptist Masüger: Schweizerbuch der alten Bewegungsspiele. Stuttgart/Zürich, 1955

  • Platzgerverband des Kantons Bern: Das «Platzgen» oder «Plattenschiessen». Thun, 1961

     

Dossier
  • Platzgen

    Ausführliche Beschreibung Valaivel a partir da: 29.05.2018
    Dimensiun: 352 kb
    Tip: PDF