L’Esprit de Genève – il spiert da Genevra

Diesch onns suenter la fundaziun da la Societad da las naziuns è cumparì «L’esprit de Genève» da Robert de Traz. En quest essai vegn declerà l'origin da la tradiziun umanitara sco ierta da trais persunalitads impurtantas: Jean Calvin, Jean-Jacques Rousseau e Henri Dunant. Lur activitad haja contribuì che la citad da Genevra è daventada il simbol per dialog, pasch e democrazia. Gia durant il temp da la refurmaziun èn persunas stgatschadas vegnidas accogliadas en la citad da Calvin che ha demussà uschia ch'ella è liberala e purtadra d’in spiert cosmopolitic. Sco bun burgais da Genevra ha Rousseau, l'autur dal «Contrat social», proponì da stgaffir ina Federaziun dals pievels per garantir ina pasch sempiterna. En quest connex s’ha el inspirà dal model svizzer. Tschient onns pli tard ha Henry Dunant preparà il terrain per la fundaziun dal Comité internaziunal da la Crusch cotschna ch'è resortì da la Convenziun da Genevra da l'onn 1864. Questa Convenziun è vegnida amplifitgada il 20^avel tschientaner. Sco consequenza èn vegnidas creadas las quatter pitgas actualas dal dretg internaziunal umanitar: las quatter Convenziuns da Genevra da l'onn 1949 e lur protocols supplementars. Vitiers vegnan differentas iniziativas che n'èn betg per forza colliadas ina cun l'autra, ma che han la medema finamira, numnadamain da defender ils dretgs umans: il «Appel spirituel de Genève» (1999), l'Appel da Genevra per scumandar las minas cunter persunas (2000) e l’Iniziativa da Genevra per la pasch en Israel e Palestina (2003). Ultra da quai na dastg’ins betg emblidar che Genevra è il center mundial da la giurisdicziun da cumpromiss internaziunala privata e la sedia da numerusas organisaziuns betg guvernamentalas e ch'ella è mundialmain la citad cun la pli gronda spessezza da funcziunaris da las Naziuns Unidas.