La tradiziun da textilias da Son Gagl ha caracterisà l’aspect da las citads e da la cuntrada, ma er ils umans da la Svizra orientala. La savida davart la producziun, l'elavuraziun e la vendita è vegnida dada vinavant sur generaziuns. Al cumenzament dal 20avel tschientaner aveva bunamain mintga chasa en il chantun Son Gagl ina persuna che lavurava a domicil u en la fabrica per la branscha da retgamada. Oz produceschan nov interpresas da retgamada en la Svizra orientala di per di tailas innovativas d'auta qualitad cun las maschinas las pli novas per ils creaders da moda ils pli enconuschents dal mund. Mo pli paucs manaschis da retgamada da la Svizra orientala, uschenumnads retgamaders pajads, produceschan per questas nov interpresas. Per motivs da custs lascha la gronda part da las firmas er producir a l'exteriur.
Il retgamar a maun cun la maschina, ch'è daventà en il fratemp ina tradiziun, vegn exercità mo pli da paucas persunas. En ils museums a Son Gagl, a Balgach, a Flawil ed a Stein en l'Appenzell Dador pon ils visitaders contemplar retgamaders che retgameschan a maun cun la maschina.
En lur archivs tegnan las interpresas da retgamada en salv ils musters da lur atgna producziun. Da quels vegnan prendidas novas ideas ed inspiraziuns. En la biblioteca da textilias, construida l'onn 1886, sa chattan var 36'000 objects davart ils pli impurtants svilups tecnics ed istoric-culturals da textilias. Passa milli cudeschs da musters dals fabricants d'antruras sa chattan là.
