Il pelegrinadi a «Maria im Stein» ha cumenzà il 14avel tschientaner, cur ch'igl è capità in emprim miracul en ina grotta da spelm. Oz sa chatta en quel lieu la chaplutta da grazias cun ina statuetta da Nossadunna. Pelegrinas e pelegrins da tut la Svizra e da l'exteriur vischin visitan quest lieu. En spezial vegnan umans da differentas etnias che vivan en Svizra a «Maria im Stein» (Albanais, Filippins, Talians, Portugais, Slovacs, Spagnols e Tamils). Schizunt ils Tamils hinduistics fan viadis a quest lieu da grazia. La gronda attracziun sur ils cunfins etnics e religius ora e l'effect integrativ da quest lieu da pelegrinadi èn sa sviluppads senza ina promoziun instituziunalisada.
Cun ina interrupziun durant il temp da revoluziun procuran ils Benedictins da la claustra Beinwil (Soloturn) dapi l'onn 1636 per la pastoraziun da pelegrinadi. Els han dischlocà lur claustra l'onn 1648 a Mariastein. Quella è vegnida secularisada l'onn 1874 durant il cumbat cultural. Il pelegrinadi è però sa mantegnì ed è vegnì tgirà vinavant dals Benedictins. L'avat e la cuminanza èn ids en l'exil en Frantscha e pli tard en Austria, nua ch'els èn vegnids spedids l'onn 1941. Sut il dretg d'asil han els dastgà turnar en la claustra veglia ch'è vegnida reconstituida tenor il dretg public l'onn 1970/71.
