Far fain selvadi en la Svizra centrala

La stad van umens, dunnas ed uffants sin spundas alpinas ch’èn difficilmain accessiblas per far fain là. Questa prada n’è betg adattada sco pastg per il muvel, perquai ch’ella è memia stippa. En tudestg vegn ella savens numnada «Planggen» ed il fain che vegn fatg là, vegn numnà fain selvadi. I sa tracta da fain magher che crescha en pitschnas quantitads e che vegn racoltà maximalmain ina giada l’onn. Far fain selvadi è ina lavur privlusa e strentga che pretenda tecnicas spezialas. Tradiziunalmain vegn il fain segà cun la fautsch. Cura che l’erva è setga, vegn ella messa en burdis, che vegnan numnads «Burdene» u «Pinggel» e che vegnan lura fixads vi da la suga da fain. Questas sugas da fildarom èn vegnidas installadas aposta a partir da la fin dal 19. tschientaner per facilitar il transport. Il far fain selvadi è mecanisà ferm ozendi. Sper maschinas da segar ch’èn vegnidas adattadas aposta per quest scopo, vegnan er helicopters en acziun per transportar il fain. Ina pratica unifitgada na datti però betg. Igl è plitost uschia, che las tecnicas veglias existan sper las novas. Il far fain selvadi è derasà surtut en la Svizra Centrala ed en il chantun Glaruna e va enavos en il 17. tschientaner, cura ch’il commerzi cun il chaschiel dir è sa sviluppà en questa regiun. En il 20. tschientaner han ins smess en blers lieus da far fain selvadi. Per motivs da la protecziun da la natira ha il far fain selvadi dentant puspè survegnì schlantsch il cumenzament dal 21. tschientaner. Sco prads maghers han las «Planggen» numnadamain ina gronda biodiversitad. Per quest motiv vegn la cultivaziun da las «Planggen» sustegnida cun pajaments directs. Senza questas contribuziuns vegnissi probablamain fatg fain selvadi mo anc en paucs lieus.

Artisanat tradiziunal