Ultra da las grondas musicas instrumentalas è la Bandella pli pitschna ina part impurtanta da la musica populara en il chantun Tessin. Entant che furmaziuns cumparegliablas eran pli baud fitg derasadas al sid da l'artg alpin, èn ellas oz daventadas raras ed existan quasi mo anc en il Tessin. Ed er là datti adina pli paucas Bandelle. Pli baud accumpagnavan las Bandelle tut ils eveniments socials, culturals e politics impurtants. En la segunda mesadad dal 20avel tschientaner èn ellas daventadas l'element tipic dal maletg turistic-folcloristic dal Tessin. Sco fenomen social e sco tradiziun viva cun profunda enragischaziun locala, influenzadas er d'experientschas da migraziun, furman questas pitschnas furmaziuns oz ina part da l'identitad e da l'istorgia dal chantun.
L'instrumentaziun d'ina Bandella sa restrenscha per il solit a clarinettas ed ad instruments a flad da sturs (mintgatant cun in saxofon, in accordeon u – pli darar – ina ghitarra). Las musicistas ed ils musicists sunan savens senza notas. Il repertori è multifar e cumpiglia – ultra da tocs tradiziunals e da chanzuns popularas – er arias d'opera, musica da divertiment ed il jazz dals onns 1930 cun ses ritmus sincopics. Cumpareglià cun pli baud èn quai bain pli paucas furmaziuns che sa deditgeschan a questa musica. Las Bandelle actualas na sa restrenschan persuenter betg al material tradiziunal, mabain tschertgan cun lur repertori er novas vias – e quai cun success.
