La Demoscena è ina communitad internaziunala averta da la cultura digitala, che ha transfurmà l'utilisaziun creativa dals computers en ina tradiziun. Las demoscenras ed ils demosceners sviluppan programs da computer (codes da program realisabels) per producir animaziuns audiovisualas. Las producziuns che vegnan numnadas demos e che vegnan caracterisadas – tut tenor perspectiva – sco ovra d'art u sco artefact digital, stattan en il center da las activitads da la scena. Las demos procuran per ina fascinaziun che ha sveglià in spiert da cuminanza unic en la scena e che ha gidà essenzialmain ad etablir la Demoscena sco tradiziun. Ina gronda impurtanza han plinavant las demopartys. A chaschun da quests festivals che celebreschan la creativitad digitala, vegnan preschentadas al public e valitadas las producziuns las pli novas en differentas categorias da cumpetiziun – numnadas compos.
Las demoscenras ed ils demosceners da la Svizra han contribuì essenzialmain per sviluppar la scena internaziunala ch'è sa derasada cuntinuadamain dapi ch'ils computers persunals pajabels èn sa manifestads ils onns 1980. Fin oz è la communitad fitg activa en Svizra e gida a sviluppar novas furmas da demos ed ad intermediar la savida da la communitad.
