Tranter las diversas orientaziuns da la tradiziun textila svizra è la stampa sin textilas dal chantun Glaruna gia baud sa fatga in num. Fin oz è questa tradiziun anc preschenta en ina cultura memorativa viva, en testimonis dal passà architectonics ed en modas da lavurar innovativas d’artisanas e d’artisans da textilas sco era da designras e designers. Grond è il dumber da motivs inspirads da diversas tradiziuns textilas mundialas ch’èn vegnids sviluppads sin il territori dal chantun. Quels giaschan ussa per part en archivs privats, en il Glarner Wirtschaftsarchviv ed en il Museum des Landes Glarus. Quests motivs circuleschan stampads sin mangola en furma d’imitaziuns favuraivlas dapi il 18avel tschientaner ensemen cun numerus products da concurrenza da l’Engalterra, da la Frantscha e dals Pajais Bass sin il martgà global ch’è sa sviluppà alura.
Ozendi demussan ils motivs e faziels glarunais in passà che vegn savens raquintà sco istorgia da pionier e da success cun ses si e giu. Cunzunt la segunda mesadad dal 19avel tschientaner, la quala è ida en l’istorgia glarunaisa sco ina miracla economica, influenzescha fin oz l’identitad da las Glarunaisas e dals Glarunais. Quels s’identifitgeschan dapi generaziuns cun quest sectur economic che ha purtà considerabla bainstanza a la val. Cunzunt ils faziels glarunais – ils «Mouchoirs» ch’èn ozendi enconuschents sco bandanas – èn daventads il simbol d’identificaziun dalunsch derasà. Lur motiv da Boteh che circulescha en Glaruna en mintga colur imaginabla sin vaschella, buttiglias, cartas bancaras e bler dapli, regordan a l’istorgia da varga 250 onns, da la quala l’ultim chapitel sco patrimoni immaterial n’è probablamain anc betg scrit.
