Manufacturas textilas han sviluppà en il Grischun in’atgna expressiun en il decurs da lur istorgia. La «Manufactura Tessanda Val Müstair» è sa deditgada sco ina da las davosas tessarias a maun professiunalas da la Svizra a la tgira da quest vegl artisanadi. Ella dat lavur a 18 collavuraturas e scolescha regularmain concepidras e concepiders da tessids. I vegnan elavurads fils natirals sco glin, mangola, launa, saida u chonv. Or da quels vegnan stgaffids exclusivs products d’auta qualitad per la cuschina, il bogn, la chasa ed accessoris. Er en autras vals dal chantun datti ateliers da taisser, nua che gruppas da tessunzas e tessunz u singuls dad els taissan principalmain per lur agen diever. En divers lieus vegnan purschids curs da taisser. Var 60 persunas appartegnan a la gruppa regiunala da l’uniun Textilforum. Ellas tgiran il barat tar inscunters annuals.
Il term «pitg da crusch grischun» è enconuschent sur ils cunfins dal Grischun. Questa tecnica vegn pratitgada da cusunzas e cusunzs da costums e da surcusidras e surcusiders per hobi. Ils materials caracteristics èn glin natiral sco basa e fil da surcuser en las colurs rosa antic, cotschen u blau. In revers perfetg, tar il qual mintga fil va en la medema direcziun, distingua il pitg da crusch grischun odiern. Tipics èn motivs sco chatschs da cors, rosettas u startugls cun flurs u feglia. Tipica è l’uschenumnada «negla grischuna». Numerusas publicaziuns da motivs cuntegnan musters per il pitg da crusch grischun. Motivs tradiziunals vegnan elavurads artisticamain en concepts moderns e vivan vinavant en questa furma.
