Malgrà che martgads perdan impurtanza pervia da la midada dal cumportament da consum en il decurs dal 20avel tschientaner, investescha Huttwil en l’Argovia Sura ils ultims onns bler en la tgira da questa tradiziun. Ultra dal martgà da verdura emnil cun products regiunals datti martgads da primavaira, da stad, da tschagulas e d’atun sco er in martgà da Silvester. Plinavant vegnan organisads martgads tematics sco il martgà da Nadal, il martgà da chaschiel ed in martgà d’artisanadi istoric. Ils numerus martgads da quest lieu plitost pitschen che na giascha ozendi betg pli sper in’axa da traffic principala mussan, quant gronda che la tradiziun da martgads è qua. Grazia a l’engaschi da la populaziun da Huttwil e da la vischnanca durant ils ultims onn ha questa tradiziun pudì reviver, s’adattar als basegns actuals e mantegnair sia vitalitad.
Huttwil tgira sia tradiziun sco anteriur center da martgads sper la lingia da colliaziun directa tranter Berna e Lucerna. L’origin dal dretg da martgà da Huttwil n’è betg documentà. Il dretg vegn dentant numnà per l’emprima giada 1467. El decurs dals tschientaners è il martgà da Huttwil daventà la scena da diversas reuniuns realas e fictivas: El ha servì sco lieu da scuntrada per l’emprima assamblea bernaisa avant la guerra da purs, tar Jeremias Gotthelf è el il lieu per ina mustra da spusas ed ina novella da Carl Albert Loosli sa splega sin il martgà da Huttwil.
