Mintg'onn ils 24 da december van ils dudesch umens da la Confraternitad da Son Bastiaun a Rheinfelden en la baselgia da la citad da Son Martin per la laterna da la pestilenza e portan quella suenter l'ultim tuc dal zain da las 23.00 tras la citad veglia stgirentada. Ils umens che portan mantels e cilinders nairs passan en ina colonna da trais tar 6 bigls da la citad. Arrivads al bigl schlian els lur furmaziun da marschar, stattan en rudè e chantan lur chanzun da Nadal. Suenter il gir che dura in'ura ha lieu la messa da mesanotg ecumenica. Ils 31 da december a las 21.00 vegn l'usit repetì cun ina chanzun da Bumaun e terminà dapi intgins onns cun in concert d'orgla en la baselgia da Son Martin.
La Confraternitad da Son Bastiaun è vegnida fundada l'onn 1541 a chaschun d'ina pestilenza repetida ed ella ha silsuenter introducì l'usit da Nadal e da Bumaun dal chantar al bigl. Dapi il temp medieval è il Son Bastiaun l'ultim refugi per malsauns da la pesta. Perquai ha la Confraternitad da Son Bastiaun tschernì quest num. Las chanzuns duain purtar la benedicziun e proteger cunter ulteriuras pestilenzas. Il chant en il silenzi ed en la stgirezza da la citad veglia da Rheinfelden durant la legria da la festa da Nadal regorda al temp da sgarschur da pli baud cura che la pestilenza era derasada en il pajais.
