Festa dals bigls

Ils 12 da settember 1814 è Neuchâtel vegnì integrà en la Dieta federala. Malgrà quai tutgava il chantun vinavant er anc al Retg da la Prussia. Perquai eri scumandà als abitants da la Val-de-Travers da festegiar la nova appartegnientscha a la Confederaziun. Ma quels n’han betg gì tema ed han guntgì il scumond, fidels a lur spiert revoluziunari, e piglià la festa dals bigls tradiziunala sco pretext per celebrar tuttina. Oz sa regordan ins en la gronda part da las vischnancas plitost dal 1. da mars 1848, la data da la revoluziun a Neuchâtel, ma en dus lieus vegn anc adina celebrada la festa dals bigls, numnadamain a Buttes ed a Môtiers. Uschia vegnan ils differents bigls dal vitg decorads mintgamai ils 12 da settember en moda pli u main originala: ils ins cun simplas chandailas, ils auters cun entiras scenarias. La saira organiseschan la musica dal vitg e las classas da scola in cortegi, al qual sa participescha er la glieud dals conturns. Ils uffants èn vestids tenor in tschert tema. Il cortegi sa ferma davant mintga bigl per chantar ina chanzun, tranteren suna la musica dal vitg. Quels che han creà la «curunaziun dal bigl» respectiva sa preschentan lura sper lur ovra e survegnan laud e buns giavischs. Dapi il cumenzament è questa festa vegnida celebrada en moda spontana e senza directivas u comités d'organisaziun. La scola e la musica dal vitg giogan però ina rolla centrala tar il mantegniment da questa bella tradiziun.