Chantar, far teater e scriver en patua u dialect dals Sensler è ina via per mantegnair vivant in element dal patrimoni cultural friburgais e da revenditgar l’appartegnientscha ad ina regiun. Las occurrenzas en la domena dals arts vivants permetta damai da salvar, valurisar ed intermediar quest patrimoni linguistic. Il patua francoprovenzal, u patua friburgais, ed il dialect dals Sensler han dentant in status bain different. Il patua ch’è vegnì discurrì cuntinuadamain en la part francofona fin l’entschatta dal 20avel tschientaner è ina lingua postvernaculara che vegn ozendi be pli discurrida d’ina minoritad. Entant è il dialect dals Sensler ina lingua dal mintgadi e currenta en la part germanofona.
L’expressiun dals arts vivants sa distingua pia tut tenor appartegnientscha linguistica. En la part francofona han il chant ed il teater en patua in bel success. Las aspectaturas ed ils aspectaturs sco er las artistas ed ils artists, giuvens e main giuvens, scuntran gugent tar questas activitads sin las sonoritads e las expressiuns genuinas da questa lingua e tractan temas recurrents sco la vita en ils vitgs, la famiglia, la vita sin l’alp e la chascharia. Tar ils germanofons exprima l’art en il dialect la revendicaziun d’in particularissem dals Sensler e cumprova la vitalitad da quest dialect. Quel vegn er duvrà en la musica actuala, emissiuns da radio e projects musicals u culturals ch’uneschan la populaziun dal district.
