Patinar sin il Doubs

Mintgatant a mez enviern sa transfurma il Doubs, il cunfin natiral tranter il Giura svizzer ed il Giura franzos, en ina lunga pista dad ir cun patins. En cumparegliaziun cun ils gronds lais è el bain mo in simpel flum, tuttina vala il Doubs sco la patinera natirala la pli gronda da l'Europa. Sia «stagiun» sa drizza dal tuttafatg tenor las cundiziuns meteorologicas e po durar mintgamai dad in fin a trenta dis l'onn. Però i na dat betg in chalender uffizial: Las autoritads na vulan betg surpigliar la responsabladad per eventuals accidents ed uschia vegni patinà tut libramain ed autonomamain. Per vegnir a savair sche la qualitad dal glatsch basta per tegnair ina persuna, vegn quella analisada tenor ina tecnica secreta, tradida dals antenats. Questa tecnica, numnada «bittar il crap», consista da tschertgar al lieu in crap d’ina tscherta grondezza e da bittar quel ad in’autezza predefinida. Il tun ch’è d’udir tar ses culp determinescha exact la stabilitad dal glatsch. Sch’il test e positiv, festinan las abitantas ed ils abitants dals conturns per pudair profitar dal glatsch perfetgamain glischnus. Bainspert dentant vegnan nà da differents lieus bleras persunas che aman dad ir cun patins e da glischnar enturn. Plinavant vegnan er attirads tschients, gie schizunt millis da turists per profitar da quest spievel schelà gigantic che serpegia l’emprim en la planira e sfunsa silsuenter amez las chavorgias cun lur cuvels e grips glischants. Il Doubs è ina magnifica plazza da giugar – qua e là stans cun bavrondas – sin il traject da Brenets (CH) e Chaillexon (F) fin al Saut-du-Doubs ch’è daventà ina caracteristica impurtanta da l'identitad locala. Il cunfin sparescha a favur d’ina gronda fraternitad transcunfinala.

Natira ed ambient