Nudar en l’Aara a Berna

Maletg 1 /

‹ › ×

Berna n'ha bain nagin lai. Però procuran l'Aara ed il nudar en l'Aara - ch'è ordvart popular e pervia da l'aua per part relativamain selvadia er excitant - dapi dacurt a la citad in renum internaziunal. Uschia vala Berna a Berlin, a Boston ed en autras citads sco ideal per il bagnar en il flum e sco exempel per la bellezza d'aua netta. In factur decisiv per la tradiziun dal nudar en l'Aara è numnadamain la purezza da l'aua ch'è en cumparegliaziun cun il rest dal mund ina curiusitad. Entant che l'Aara haveva pli baud ina funcziun da protecziun e serviva sco accumulaziun d'aua, sco funtauna da nutriment e sco via da transport, è ella oz l'ensaina natirala da Berna. Cun ils bogns gratuits Eichholz, Marzili e Lorraine è ella ina impurtanta zona da recreaziun locala per la populaziun e contribuescha a l'auta qualitad da viver a Berna.

Nudar en l'Aara a Berna fa vegnir dependent. Persunas endiridas nodan dapi 25 onns la fin d'atun ils 350 meters dal «Zibeleschwümme». Per il rest da las Bernaisas e dals Bernais tutga il nudar en l'Aara inseparablamain tar la stad. Sco punct da partenza servan en emprima lingia ils dus bogns da flum cun ritga tradiziun: il «Marzilibad» (1782) ed il «Lorrainebad» (1892). Là vegni s'inscuntrà, deponì la vestgadira e suandà la collona da persunas che spassegia amunt. Davent dal Lorrainebad en direcziun Altenbergsteg, davent dal Marzili en direcziun Schönausteg. Sch'ins è ì ditg avunda, vai liber: ins sa metta en l'aua e sa lascha purtar dal flum oragiu. Sut l'aua suna la musica da l'Aara: crappels che fan suns intgantants.

Malgrà ils lieus d'entrada e da sortida bain vesaivels, è l'Aara privlusa ed adattada mo per persunas ch'èn gia sa famigliarisadas cun il flum. Ils blers uffants bernais van l'emprima giada en l'Aara cun la mamma e cun il bab. In eveniment ch'els braman ardentamain. Pli tard transmettan els questa tradiziun a lur agens uffants.