Fravgia

Il fravegiar che vegn er numnà il batter il fier, è in artisanadi tradiziunal ch’è sa sviluppà, grazia ad innovaziuns permanentas, dapi il temp da bronz enfin oz. Las fravias ed ils fravis creeschan ozendi tocs unics, fatgs a maun, ch’èn tant estetics sco er funcziunals. La vasta paletta da products che porscha pussaivladads creativas infinitas, cumpiglia objects artistics dal mintgadi sco er preziusadads discretas da gronda valur. Las fravias ed ils fravis fan diever da la savida, da las tecnicas e dals urdains ch’èn vegnids transmess, per part durant tschientaners, u ch’èn vegnids rescuvrids tras experiments e tras il studi da lavurs istoricas da ferrer. L’artisanadi tradiziunal è restà en vita en l’entira Svizra. En var ventg manaschis pitschens lavuran fravias e fravis ed els fan quai sco professiun principala. Plinavant han bleras persunas scuvrì il fravegiar sco hobi fascinant. Tar ils objects che vegnan fravegiads ozendi a maun, tutgan utensils agriculs, portas e giatters fatgs sin mesira, ma er objects d’art en il sectur da las sculpturas da metal. Tranter quels èn la restauraziun istorica da las lavurs da metal che stattan sut protecziun da monuments, e la replicaziun d’armas istoricas, da cliniez e d’urdains per l’archeologia experimentala u per amaturas ed amaturs.