L’entschatta da november prevesa il chalender ecclesiastic la commemoraziun da las persunas defunctas. Quai è in mument che ha anc oz ina gronda muntada per ils contacts ed ils barats socials en il Tessin – sco er en numerusas autras regiuns catolicas ed en autras culturas, ch’enconuschan dentant autras datas per commemorar lur morts. Sper il cult da las olmas cun las celebraziuns liturgicas e cun la tgira speziala dals santeris, van ils confamigliars mintgamai il 1. ed ils 2 da november sin las fossas da lur charas e chars. I sa tracta d’ina isanza spontana e betg standardisada, tar la quala la glieud e las famiglias van mintgatant da vischnanca a vischnanca per s’entupar e per sa fermar sin las fossas da confamigliars u d’auters commembers da las communitads localas.
Quests usits èn in mument impurtant per sa barattar e per tgirar ils lioms persunals e quels cun la comunitad locala e regiunala. Els èn ina pratica transversala ed intergeneraziunala che involva l’entira societad. En il passà eran questas occurrenzas caracterisadas da differentas isanzas ch’èn oz per gronda part sparidas. Intginas veglias isanzas da mangiar en connex cun questa occurrenza percunter datti anc adina. Tenor questas isanzas vegnan preparadas spaisas dultschas spezialas sco ils uschenumnads «oss da mort» (u «oss da morder») u il «paun dals morts» che deriva da la regiun vischina Lumbardia.
