Var 136 000 tiraduras e tiradurs en Svizra exerciteschan e sa mesiran regularmain en differentas disciplinas, cultiveschan activitads d'uniun multifaras cun usits dal tir e cun rituals transmess. La tradiziun svizra dal tir tanscha enavos fin als origins da la Confederaziun svizra, en spezial cun la figura da Guglielm Tell, che vegn menziunada dapi il 15. tschientaner. Tras la fundaziun da la Societad svizra da tiradurs l'onn 1824 ad Aarau, da la quala è resultada la Federaziun svizra da tiradurs (FST) dad oz, ha la tradiziun dal tir survegnì sia furma moderna. Il temp da fundaziun da la FST è collià inseparablamain cun il svilup d'ina identitad statala moderna ils onns 1824 fin 1848, quai ch'è stà la premissa per il stadi federal modern.
La tradiziun dal tir viva da las festas da tir e d'autras occurrenzas, a las qualas las commembras ed ils commembers activs da las societads da tir participeschan ensemen cun persunas interessadas e cun il public. Organisatoricamain consista la FST da 26 federaziuns chantunalas e da var 2500 autras federaziuns ed uniuns. Cun ils curs per tiraduras e tiradurs giuvens sco er cun ulteriuras occurrenzas, sco la Festa federala da tir per giuvenils ed il «Knabenschiessen», procura la FST che la tradiziun dal tir haja er en l'avegnir avunda persunal. Ultra da quai pussibilitescha la FST a sportistas d'elita svizras, sco Heidi Diethelm Gerber (medaglia da bronz a Rio de Janeiro 2016) e Nina Christen (medaglia d'aur a Tokio 2021), da furnir prestaziuns maximalas sco atletas.
