La launa-nursa tessinaisa è ina materia primara impurtanta che vegn ozendi sfruttada darar localmain. En la Val Verzasca resta ella tuttina en il center d’ina impurtanta chadaina da producziun fatga en moda tradiziunala ma er innovativa. Questa savida ch’è colliada stretgamain cun l’origin rural da la Val vegn dada vinavant dapi pli che 90 onns da l’Associazione Pro Verzasca, fundada l’onn 1933 ed activa en la promoziun culturala, cunzunt cun sustegnair la producziun artisanala – en particular l’elavuraziun da la launa – che vegn oramai sustegnida da divers acturs locals (instituziuns, instituts culturals etc.).
Al center da l’elavuraziun è la launa-nursa locala (raz Alva Alpina) che vegn cumbinada cun launa mohair, cun launa da lama e d’alpaca sco era cun autras fibras natiralas. Il process d’elavuraziun suonda per part anc gests antics che vegnan dads vinavant: la tinctura, il filar e la tessaria da la launa vegnan numnadamain fatgs cumplettamain a maun grazia a collavuraturas e collavuraturs ch’èn suttamess a la Pro Verzasca. La launa vegn lavada a Sonogno en il center da la Pro Verzasca cun ina maschina, sviluppada ad hoc, che permetta da la lavar a temperatura bassa e senza agiunta da products chemics. La tinctura vegn fatga sulettamain cun products natirals sco feglia, paletschas, ragischs u scorsas. La launa vegn tessida a maun cun il «firadell» (la roda da filar) al domicil sez da las filunzas e dals filunzs. Ils products finids vegnan commerzialisads directamain da la «Casa della Lana» a Sonogno e cun la butia online.
