L’ultim trend da nudar en auas fraidas da Genevra è considerabel e spectacular. Questa pratica ultra-contemporana ha dentant ragischs en temps passads. Dapi il temp medieval èn attestads durant tut l’onn a Genevra bogns en lais, la frestgezza dals quals ins po tgunsch s’imaginar. Il 18avel tschientaner ha Rousseau ardentamain promovì la vita or en il liber ed ils bogns fraids sco er bogns publics situads a lais, al Rodan u a l’Arve.
La popularitad da l’idroterapia il 19avel tschientaner en l’Europa animescha il diever d’auas fraidas ensemen cun il progress igienic. Il trend public da nudar en auas fraidas sa mussa durant ils emprims decennis dal 20avel tschientaner parallelamain cun la popularisaziun creschenta da bogns publics: alura sa furma la conscienza d’ina pratica che favurisescha la sanadad da finadin e che vegn er vivida sco ina legria collectiva e festa.
Quella è caracterisada da la creaziun dal “Coupe de Noël” l’onn 1934 en connex cun la renovaziun e reconstrucziun massiva (1932) dals Bogns da Pâquis. Il dumber da participantas e participants crescha ad in crescher da 7 nudaders tar l’emprima ediziun a 4500 l’onn 2023. Ozendi mussa il fenomen dal «winter swimming» genevrin, ch’è medemamain daventà in eveniment turistic, ch’il “Coupe de Noël” ed il nudar en auas fraidas è entant inscrit en il patrimoni individual e collectiv da la populaziun genevrina.
