El dat perditga dal caracter original e stinà da la regiun, l’absint ch’è naschì a Couvet la mitad dal 18avel tschientaner. Suenter in temp da prosperitad remartgabel il 19avel tschientaner ha ses scumond effectiv da 1910 fatg ceder l’absint en la clandestinitad e fatg daventar quel in mitus grazia a la stinadadad ed insistenza da la populaziun da la Val de Travers. Quella ha cuntinuà malgrà tut a destillar, vender e consumar l’absint. La «Fée verte», pia la «Diala verda», n’è numnadamain betg be in aperitiv e sia consumaziun è anc oz colliada cun rituals e misteris, inclusiv quel da las «funtaunas fraidas» (buttiglias d’absint èn mintgatant zuppadas en guauds en la proxima vischinanza da funtaunas). E sch’il diever da zutger sin in tschadun perfurà artisticamain è daventà rar, resta la degustaziun da l’absint ina part da questa tradiziun: in magiel che sa schlargia e che permetta a «la blaua» da liberar sias subtilitads, ina funtauna emplenida cun aua sfradentada turbla dagut per dagut l’alcohol destillà, la convivialitad ed il plaschair da questa veglia pratica da cuminanza, mintga pass contribuescha al fatg che «baiver ina pitschna» n’è betg in simpel apero.
Cun ses return a la legalitad l’onn 2010 ha la «Diala verda» puspè chattà ses plaz, numnadamain quel d’ina tradiziun amez l’identitad d’ina regiun che survegn ozendi vita grazia ad ina trentina da destillarias e da destillaturas e destillaturs che cultiveschan per part sezs las plantas per lur recepts. Suenter ch’il Museum regiunal ha salvà il Setgentader d’absint da Boveresse e l’emprima «Festa da l’absint» (numnada «Absinthe en fête») l’onn 1998, è vegnida inaugurada 2014 la Chasa da l’absint che cumbinescha a moda innovativa cultura, economia e turissem.
