Bindels da saida e taisser bindels

Taisser bindels è stà ina branscha industriala impurtanta en la regiun da la Svizra dal nordvest. En ils chantuns Argovia e Soloturn exista quest artisanadi fin oz. En ils dus mezs chantuns da Basilea è il taisser bindels da saida svanì bunamain dal tuttafatg durant ils onns 1920; l'onn 1988 ha l'ultima tessunza da bindels da saida, che lavurava a domicil, dà si ses mastergn, l'onn 2004 è vegnida serrada l'ultima tessaria.

Il taisser bindels da saida è vegnì purtà en la regiun da Basilea durant il 16^avel tschientaner tras persunas che han stuì fugir da l'Italia e da la Frantscha per motivs confessiunals. L'onn 1670 ha il Cussegl da Basilea permess ils emprims talers da pliras bartginas, pussibilitond uschia ina industrialisaziun tempriva. En la champagna da Basilea vegnivan producids sin tals talers bindels da saida en lavur a domicil. Quai tenor il sistem d'atelier per in «signur da bindels» en la citad. Pir en il decurs dal 19^avel tschientaner èn vegnidas construidas fabricas, l'emprim en la citad e pli tard er en la champagna. Durant il 20^avel tschientaner han quels da la champagna empruvà da cumbatter cunter il declin dal taisser cun agid da l'electrificaziun dals talers. L'onn 1904 avevan perquai gia 35 vischnancas da Basilea-Champagna electricitad en ils vitgs.

En la champagna vegn tgirada oz la regurdientscha a la lavur a domicil che ha purtà in gudogn finanzial a bleras persunas, ma che ha er mussà il dischequiliber da pussanza tranter il chapital en la citad e la lavur en la champagna. En la citad è l'industria da bindels da saida preschenta tras las chasas dals anteriurs «signurs da bindels», savend ch'il svilup industrial odiern na fiss betg stà pussaivel senza bindels da saida.