Il chantun Basilea-Citad ha bleras tradiziuns vivas che han savens in'impurtanza regiunala, en il cas dal tschaiver da Basilea in'impurtanza naziunala u schizunt internaziunala. Tradiziuns vivas na vegnan dentant betg mo preschentadas en occurrenzas tradiziunalas grondas, mabain èn impurtantas er en la vita da mintgadi dals umans. Exempels per quai èn la cultura che vegn vivida en las uniuns, il temp da preparaziun per il tschaiver da Basilea durant l'entir onn cun la cultura multifara en las cliccas, ma er il sistem vivì da mastergnanzas e da societads sco ch'el è da chattar enturn il «Vogel Gryff», ubain la preschientscha da las navettas tradiziunalas da Basilea sin il Rain, in med da transport che vegn apprezià en il mintgadi.
La promoziun da la cultura
Considerond il grond dumber da museums, ulteriuras instituziuns e la scena artistica e culturala innovativa vegn l'accent da la promoziun chantunala da la cultura mess en il chantun Basilea-Citad cleramain en il sectur professiunal. La cultura populara en il senn da las tradiziuns vivas vegn promovida dal chantun mo punctualmain u indirectamain, per exempel cun contribuziuns regularas a las federaziuns da la musica instrumentala tradiziunala, ma er cun in model per promover chors che resguarda la qualitad particulara da la scena da chors fitg multifara e viva en la regiun da Basilea. Regularmain vegnan promovidas cun meds finanzials or dal fond da Swisslos occurrenzas tradiziunalas e manifestaziuns culturalas fitg popularas, sco per exempel il festival da jazz che sa numna «Em Bebbi sy Jazz».
Sa chapescha datti er divers connex tranter las tradiziuns vivas e l'intermediaziun dal ritg patrimoni cultural material. Per segirar, per conservar e per intermediar il patrimoni istoric-cultural ed istoric-natiral dal chantun èn ultra dals 5 museums chantunals responsablas ed impurtantas las suandantas instituziuns: la Perscrutaziun archeologica dal terren, l'Archiv dal stadi da Basilea sco er la Tgira chantunala da monuments.
Las tradiziuns vivas dal chantun Basilea-Citad
L'exempel il pli popular d'ina tradiziun viva è senza dubi il tschaiver da Basilea che ha lieu 3 dis l'onn. La gronda impurtanza da las occurrenzas avant il tschaiver e da la preparaziun creativa individuala tant sco la ritga cultura da las cliccas caracteriseschan e dattan vita a la citad er ordaifer ils 3 dis ils pli bels («drey scheenschte Dääg»). Il tschaiver sez è ultra da quai in'attracziun turistica ed in eveniment che vegn percepì sin plaun naziunal.
Er la messa d'atun da Basilea che ha ina tradiziun da passa 500 onns na dastga betg mancar en il program annual da la citad. Ella vala oz sco fiera la pli gronda da la Svizra ed è - sco messa en il center da la citad - colliada stretgamain cun la citad da Basilea e cun sia populaziun. Caracteristicas en quest connex èn las differentas spezialitads culinaricas sco ils zutgerins da la fiera che sa numnan «Mässmogge» u il paun da fiera («Magenbrot»). La fiera d'atun da Basilea attira mintgamai passa 1 milliun giasts da la Svizra e da l'exteriur.
Ina chaussa particulara per la cultura da la citad è er l'uschenumnà «Vogel Gryff» che vegn organisà e realisà da las 3 societads d'onur dal quartier Kleinbasel. Quai è il firà il pli impurtant da Kleinbasel che ha lieu en moda alternanta ils 13, ils 20 ed ils 27 da schaner. Elements da questa isanza cumplexa èn il gir giu per il Rain sin ina puntera, il cortegi tras Kleinbasel ed ils sauts tradiziunals da las figuras d'onur che vegnan accumpagnadas d'in grond dumber d'aspectaturas e d'aspectaturs da la citad e da la regiun, cunzunt er d'uffants.
La finala tutgan er il nudar en il Rain durant la stad, il viver cun las ristgas da Basilea sco lieu d'industria e da chemia, en spezial suenter la catastrofa da Schweizerhalle l'onn 1986, il fenomen da la promoziun da l'art tras mecens sco er la gronda identificaziun cun il zoo da Basilea tar ils fenomens da tradiziuns vivas a Basilea-Citad - la glista as lascha natiralmain amplifitgar.
Actualisaziun 2023
Suenter la segunda actualisaziun da la glista da las tradiziuns vivas l’onn 2023, vegn agiuntada ussa ina nova tradiziun a la glista dal chantun Basilea-Citad:
- Pestga tradiziunala cun furtga
Ils dossiers cumplets da questas novas tradiziuns vegnan ad esser disponibels online la stad 2024.
