Ils chanals industrials istorics a Burgdorf èn unics ozendi. Tals sistems da chanals devi pli baud bain en numerusas citads, ma en blers lieus èn quels vegnids bandunads en il 20avel tschientaner. La construcziun da la rait da chanals a Burgdorf è d’attribuir al basegn d’energia da l’industria e da las emprimas fabricas. Las pli veglias funtaunas scrittas da mulins a forza da l’aua derivan dal 13avel tschientaner. Pli tard vegnivan vitiers tessarias ed autras fabricas. Vers la fin dal 19avel tschientaner devi a Burgdorf radund 35 manaschis industrials, dals quals la mesadad nizzegiava atgnas ovras idraulicas. Da l’onn 1841 datescha l’emprim contract da chanal tranter la vischnanca burgaisa e la societad d’ovras idraulicas Burgdorf, en la quala las possessuras ed ils possessurs da las ovras idraulicas pitschnas eran s’associads. Quels han ozendi in contract da concessiun cun il chantun e dattan vinavant ad adina novas generaziuns la savida davart la tgira ed il diever dals indrizs vegls ch’èn sa mantegnids excepziunalmain bain.
Il diever vegl e modern dals chanals industrials ed il svilup da la citad e regiun Burgdorf tar in lieu impurtant per energias regenerablas vegnan intermediads da differentas purschidas, sco per exempel da museums u biros da turissem. En quest reguard po cunzunt vegnir accentuada la lavur da pionier en connex cun l’energia solara ch’è vegnida promovida gia baud en il chantun da Berna cun ils implants d’energia solara dal Mont-Soleil en il Giura Bernais. En questa regiun è pli tard vegnì construì il parc da vent dal Mont-Crosin. En il Giura Bernais vegnan intermediadas l’istorgia e la muntada da l’energia regenerabla da l’Espace découverte Energie.
