La pestgada - la «Bachfischet» - d'Aarau, è tenor la mastergnanza da Wirri ad Aarau l'usit il pli vegl da la Svizra ch'è vegnì pratitgà cuntinuadamain. En il protocol dal Cussegl dad Aarau dals 3 da settember 1526 vegn il nettegiament da l'aual menziunà per l'emprima giada en scrit. Per tschientaners è l'aual da citad stà in'avaina da vita impurtanta (aua da baiver, da diever e da stizzar). Perquai èsi stà indispensabel da nettegiar el da merda e da sablun. Ozendi ha la pestgada lieu mintgamai il settember. Observond la lunga tradiziun dura la rumida da l'aual circa 4 dis. Terminada vegn ella il penultim venderdi avant las vacanzas d'atun cun in cortegi dals uffants da scola che portan ils lampiuns ch'els han fatg sezs tras la citad veglia dad Aarau stgira. Quest exodus per beneventar l'aual da citad è documentà dapi il 19avel tschientaner. Durant il cortegi chantan ils uffants la chanzun da la pestgada. Alura survegnan els insatge da mangiar e da baiver. In fieu artifizial è il punct culminant da la festa che vegn terminada uffizialmain cun in schlop final tradiziunal, cun l'uschenumnà «Mordschlapf».
La noziun da la pestgada, pia dal «Bachfischet», ha sias ragischs en il fatg che tut ils peschs da l'aual pudevan vegnir tschiffads avant che cumenzar cun il nettegiament. La giuventetgna giugava en l'aual e squittava cun aua. Er ozendi dovran ils uffants l'aual per sa divertir e l'occupan sco lur plazza da giugar natirala e divertenta. Bleras istorgias e blers eveniments tractan da l'aual. Quai mussa la gronda impurtanza che l'aual che curra tras la citad dad Aarau ha per la populaziun.
