En differentas vischnancas ed en differents quartiers da citads dal chantun Turitg han lieu mintgamai enturn ils 11 da november, il di da Son Martin, cortegis da ravas. Accumpagnads da musica portan uffants e giuvenils sin il far notg ravas stgavorgiadas ed entagliadas, illuminadas cun ina chandaila a l'intern tras las vias. Savens datti a la fin da la ruta dal cortegi insatge da baiver u ina buccada da mangiar. Quest usit da glisch vegn organisà da centers culturals e da cuminanza, d'uniuns da quartier, da cumins-baselgia, da scolas e da scolinas.
La festa la pli impurtanta cun ravas illuminadas è il cortegi da ravas da Richterswil («Räbechilbi Richterswil»). Dapi l'onn 1908 vegn quel organisà da l'uniun locala da traffic ed è sa sviluppà en il decurs dals onns ad ina festa populara cun in'attracziun surregiunala. En trens e bastiments spezials vegnan millis da giasts transportads la notg da las glischs a Richterswil.
Il purtar glischs tras las vias è in dals usits pli giuvens. Observaziuns fidadas da cortegis cun glischs en la part sura dal chantun Turitg dateschan dals onns 1920. Oriundamain vegnivan las ravas probablamain purtadas singulas tras las vias e betg en cortegis organisads. L'usit aveva lieu en champagna en in rom famigliar.
