Pictura purila en la regiun dal Säntis

Maletg 1 /

‹ › ×

La pictura purila da l'Appenzell e dal Toggenburg è unica en l'art popular da las regiuns alpinas. Il preschent mussa ina gronda varietad da furmas d'expressiun, il passà ultra da quai l‘interpretaziun vasta da la noziun «pictura purila». Picturas che mussan il puresser datti en la Svizra orientala dapi il 16avel tschientaner. Nus chattain ellas sco pictura naiva sin paraids da lain, sco maletgs principals da rudellas svizras u da rudellas d'alliaz ed en la pictura purila da mobiglias tranter il 1750 ed il 1850. Il 19avel tschientaner èn vegnids malegiads bindels da signun, funs da sadellas da mulscher e maletgs da tavla u da chargiada d'alp per purs che han vulì mussar cun superbia lur muaglia. En la segunda mesadad dal 20avel tschientaner èn sa midadas tant la pictura sco tala sco er sia recepziun. Ina burgaisia interessada vi da l'art ha demussà ses interess per la pictura purila. Il mastergn ed il turissem han duvrà quest art per far reclama. Scienziads ed amaturs han tschertgà la «stgetta» pictura purila ed èn stads da l'avis ch’ins chattia quella mo pli en maletgs dal passà entant che la nova pictura purila vegniva spretschada sco pictura nostalgica, pictura da dumengia u pictura da souvenir. Questa valitaziun è entant vegnida curregida. Tranter ils artists dal 20avel tschientaner hai dà e datti divers cun ina gronda forza creativa, tranter quels er purs che malegian. Els han sviluppà in stil persunal ed han chattà novas furmas d’expressiun per malegiar ils motivs vegls dals usits da la cultura d’alp.