Poyas – la chargia d'alp

En il dialect da Friburg è il pled da duas silbas «poya» il pled per la chargiada d'alp. Dapi ils onns 1960 vegn questa noziun duvrada atgnamain per maletgs da quest impurtant eveniment da la vita purila. La «poya» è in simbol per il cumenzament dal temp da vegetaziun ed è vegnida reproducida a partir dal cumenzament dal 19^avel tschientaner sin las fatschadas dals bains purils en las Prealps friburgaisas. Mintga allevatur da muvel ha malegià sin sia chasa in maletg da sia atgna scossa che va ad alp cun il cumenzament da la primavaira. Ina «poya» mussa in lung cortegi che traversa tut il maletg: vatgas ed auters animals dal bain puril, signuns cun chapels auts ed ulteriurs elements tipics per la vita d'alp.

Sylvestre Pidoux (1800-1871), che derivava da Vuadens, vala sco emprim pictur artist da quest gener. Sias ovras èn stadas musters durabels e productivs che expriman las midadas da l'economia d'alp e da l’allevament da muvel. En il fratemp chattan ins sin ils bains purils da la regiun pliras tschient «poyas» ed i dat circa 15 picturs che fan tals maletgs. Schebain ch'il dumber d'allevaturs da muvel e da signuns sa diminuescha, s'augmenta actualmain l'interess per las «poyas» ed ellas chattan novs cumpraders: Sco element decorativ e turistic servan ellas ad embellir locals e vegnan reproducidas sin numerus objects.