Gestiun cun il privel da lavinas*

*Integrada en la glista represchentativa dal patrimoni cultural immaterial da l'UNESCO

Maletg 1 /

‹ › ×

Fatgs istorics, economics e topografics han laschà nascher en Svizra praticas e cumpetenzas spezialas en la relaziun cun la natira alpina. La gestiun cun il privel da lavinas è exemplarica en quest connex. En la societad preindustriala èn questas experientschas tradidas sa manifestadas tranter auter en la structura dals abitadis ed er en praticas religiusas sco ils fatgs votivs. Ultra da quai enconuscheva la societad da pli baud er instituziuns per dumagnar il privel da lavinas e sias consequenzas sco per exempel l'ospizi sin il Grond Son Bernard cun il chaun bernardin sco tgina dal servetsch da salvament alpin. En il decurs dal 20avel tschientaner èn vegnidas sviluppadas adina pli savens metodas per la prevenziun activa. Ultra d'indrizs per proteger e per tgirar dals guauds da protecziun tutgan latiers mesiras da planisaziun, sco chartas da privels u catasters da lavinas. A medem temp è sa midà considerablamain il servetsch da salvament, e quai tras la professiunalisaziun, tras detecturs electronics, tras tecnicas d'evacuaziun e tras servetschs aviatics (Air Glacier, Air Zermatt). Cun las instituziuns spezialisadas ha la relaziun cun il privel da lavinas survegnì en Svizra er ina nova dimensiun scientifica. Uschia è la gestiun d'alarm e da crisas vegnida amplifitgada.