Las concurrenzas da figuras da naiv, ch’èn danovamain vegnidas organisadas ils onns 1986 e 2015, existan dapi il cumenzament dal 20avel tschientaner. Sustegnidas vegnan ellas da la gasetta quotidiana «L’Impartial». Las concurrenzas dals envierns 1906-1907, 1914-1915 e 1933-1934 èn vegnidas documentadas e publitgadas en moda detagliada, entant che quest’activitad è daventada pli confidenziala suenter la guerra.
Las concurrenzas pon vegnir manadas tras oz grazia a l’associaziun «Imagineige» che cumpiglia trais commembers. Organisadas vegnan ellas en moda dal tuttafatg voluntara. En in’atmosfera da cumpagnia, da festa e da barat sa furman da tuttas sorts ovras, figurativas u betg. Las participantas ed ils participants èn numnadamain totalmain libers areguard il motiv. Las sulettas restricziuns: Igl è scumandà da lavurar tranter mesanotg e las 6.00 da la damaun sco er d’utilisar colurs, colurants u maschinas a motor. Sulet cun las atgnas stentas ston las participantas ed ils participants far resplender lur sculpturas construidas ord ils mantuns naiv che vegnan mess gratuitamain a disposiziun da la citad da La Chaux-de-Fonds. La perioda da construcziun è terminada la dumengia da mezdi.
Ina giuria va spassegiond tras la citad e valita las ovras. In premi, offert dals negoziants da la citad, vegn attribuì a mintga gruppa tenor differents criteris: integraziun en la cuntrada, difficultad tecnica, schelta dal motiv, impressiun generala, e.u.v.
Durant l’entira fin d’emna flaneschan numerusas abitantas e numerus abitants da la citad tras las vias da La Chaux-de-Fonds per visitar il differents plazzals e per admirar il svilup da las ovras. Quai creescha muments da barat privilegiads e fitg appreziads. Las figuras restan alura uschia sco ch’ellas èn fin che la natira las fa sparir cumplettamain.