Mintga dus onns è ad Ennetmoos la rallye da töfs. Sin il percurs circular che sumeglia ina pista da motocross sa mesiran töffistas e töffists en trais categorias. Entant che la spertezza è relevanta per duas categorias, fascinescha la terza cun vehichels plain fantasia davart in tema a libra schelta.
L’occurrenza è sa sviluppada l’onn 2000 or dad in’idea da la musica da tschaiver d’Ennetmoos ed è colliada cun in revival da töfs en tut la Svizra che celebrescha la veglia cultura da mopeds e la dat vinavant ad ina generaziun pli giuvna. La festa populara intergeneraziunala che porscha in program accumpagnant cun concerts da rock e musica populara attira entant radund 30’0000 aspectaturas ed aspectaturs da tuttas vegliadetgnas da l’entira Svizra. Ella vegn pussibilitada d’in comité d’organisaziun e da radund 1’200 voluntarias e voluntaris. Il represchentant da quest’occurrenza è la figura ficziunala Kari Kreidler ch’è entant legendar grazia a sias chanzuns e moderaziuns.
