La vita nomada caracterisescha l’identitad dals Jenics e dals Sinti en Svizra, schebain che bleras famiglias èn domiciliadas oz. Bleras stirpas viagian durant la stad e vivan e lavuran en la rulotta. Quest temp «sin viadi» è caracterisà da la convivenza e da la musica. Ils musicists jenics en il chantun Grischun che faschevan pli baud musica da saut han er influenzà la musica populara svizra dal 19avel tschientaner.
Cun la lingua jenica disponan ils Jenics d’ina furma d’expressiun strusch codifitgada, ch’è dentant ordvart multifara e viva. Ils Sinti percunter dovran per la communicaziun entaifer la cuminanza ina furma indigena dal romanes. Ils lioms famigliars èn fitg stretgs e la solidaritad sin la plazza da transit u tar l’activitad artisanala è d’impurtanza per segirar il mantegniment da la vita nomada.
Ils puncts culminants religius da l’onn èn ils pelegrinadis tar la «Madonna naira», la «mumma dals zighinghers», a Nossadunnaun. In’atmosfera pli mundana regia a la «Fecker-Chilbi». Questa fiera è ed è gia adina stada er in lieu per debattas politicas e per scuntradas da la maioritad cun questa minoritad naziunala renconuschida.