La Convenziun da l'UNESCO per la preservaziun dal patrimoni cultural immaterial (CS 0.440.6) è vegnida statuida ils 17 d'october 2003 da la conferenza generala da la UNESCO ed è entrada en vigur ils 20 d'avrigl 2006. Ella cumplettescha la Convenziun da l'UNESCO per la protecziun dal patrimoni mundial cultural e natiral, statuida l'onn 1972 (CS 0.451.41), destinada a la preservaziun dal patrimoni material ed immovibel. Ella cumplettescha ultra da quai la Cunvegna da l'UNESCO per la protecziun e la promoziun da la diversitad da las expressiuns culturalas (CS 0.440.8), siond che la diversitad culturala sa basa fermamain sin la ritgezza dal patrimoni cultural immaterial. Fin oz participeschan 120 stadis a la cunvegna (vesair la glista cumpletta dals stadis contractants).
Ils elements principals da la convenziun èn:
- Ils stadis contractants ston garantir bunas cundiziuns generalas per la realisaziun e tradiziun dal patrimoni cultural immaterial tant a nivel naziunal sco en la collavuraziun internaziunala.
- Ils stadis contractants ston renconuscher las persunas che portan il patrimoni cultural immaterial (cuminanzas, gruppas ed individis che stgaffeschan, cultiveschan e tradeschan quest patrimoni).
- Ils stadis contractants ston stgaffir ina «Glista represchentativa dal patrimoni cultural immaterial da l'umanitad» ed ina «Glista dal patrimoni cultural immaterial che sto vegnir protegì urgentamain». Ultra da quai ston els crear in «Fond per preservar il patrimoni cultural immaterial» che sustegna tecnicamain e finanzialmain ils stadis da la convenziun per realisar las mesiras da preservaziun.
