Cultivaziun da tschareschas

La cultivaziun da tschareschas è dapi daditg fitg impurtanta en il chantun Zug: l'emprim sco sectur da la producziun agricula d'impurtanza per l'economia publica, en il 20avel tschientaner oravant tut sco segn caracteristic ed identitar d'ina regiun en in svilup rasant. Las cumprovas las pli temprivas per culturas da tschareschers cun bists auts probablamain fitg derasads derivan dal 17avel tschientaner. Per l'onn 1627 è documentà en la citad da Zug in martgà da tschareschas. Recepts per l'elavuraziun da tschareschas a spaisas ed a bavrondas existan dapi il 18avel tschientaner. Cunzunt l'arder tschareschas a vinars ha ina lunga tradiziun. A la fin dal 19avel tschientaner ha la societad da kirsch a Zug («Kirschwasser-Gesellschaft in Zug»), fundada l'onn 1870, gì grond success cun la commerzialisaziun dal kirsch da Zug en tut il mund. Enturn l'onn 1915 ha il pastizier Heinrich Höhn da Zug inventà la turta cun kirsch da Zug. Oz produceschan intginas destillarias industrialas e numerusas destillarias purilas en la regiun passa 60'000 liters kirsch per onn. Da quels vegnan duvrads var 15'000 liters per far las turtas cun kirsch da Zug. Pervi da la gronda activitad da construcziun e pervi da la regressiun generala da l'agricultura è il dumber da tschareschers sa reducì en il 20avel tschientaner. Ina societad d'interess prova dapi l'onn 2008 da franar questa tendenza cun plantaziuns sistematicas. Circa trais quarts dals passa 400 manaschis purils en il chantun cultiveschan tschareschas.

Artisanat tradiziunal