Cumin d'Appenzell Dadens

L'ultima dumengia d'avrigl sa radunan las votantas ed ils votants d'Appenzell Dadens en il vitg dad Appenzell per far là cumin. L'avantmezdi ha lieu il servetsch divin da cumin, al qual sa participeschan er ils commembers da la regenza e da la dretgira chantunalasco er giasts d'onur. Precis a las dudesch cumenza il cortegi da la regenza, da la dretgira e dals giasts d'onur davent da la Chasa communala fin a la Plazza-cumin. Ordavant va la societad da musica «Harmonie Appenzell» sunond in marsch plaun. Ils «Rhodsfähnriche» ed ils giunchers dals set districts («Rhoden») da l'Appenzell Dadens dattan cun lur unifurmas e bandieras ina tempra viva e colurada al cortegi. Ils commembers da las autoritads portan il vestgì uffizial, ils umens er anc in'arma (sabel u spada) ed in chapè. Uschespert ch'il zain grond ha finì da tutgar, avra il president da la regenza il cumin e tegna in pled. Suenter l'elecziun dal president e dal vicepresident da la regenza prestan quels – ensemen cun il pievel – l'engirament da cumin en l'act il pli solen dal cumin. Avant las votaziuns davart las fatschentas (projects constituziunals, da leschas e da credit) vegnan confermads u elegids da nov ils commembers da la regenza e da la dretgira chantunala. Las votantas ed ils votants han la pussaivladad da prender il pled davart las fatschentas e da preschentar lur arguments per u cunter questas fatschentas. A la fin dal cumin banduna il cortegi la plazza gist uschia sco ch'el è arrivà.