Feuillu

Mintgamai l'emprima dumengia da matg marca la festa populara «Le Feuillu» il return da la primavaira a Genevra. Questa festa vegn celebrada en numerusas vischnancas dal chantun (Avusy, Bardonnex, Cartigny, Confignon, Onex, Perly, Plan-les-Ouates) e deriva probablamain d'ina tradiziun pajauna d'orgin celtic – quai laschan supponer differents rituals ch’ins observa en tut l'Europa. En il center da las festivitads stat per regla in cortegi d'uffants, nua ch'ils uffants ornads cun cranzs da flurs passan chantond e sautond tras lur vischnanca. Sin in char mainan els il Retg da matg e la Regina da matg sco er ina figura simbolica da roma e da frastgas che vegn numnada «La Bête» u «Le Feuillu». En tschertas vischnancas vegn transportà empè da questa figura in arber lung, ornà cun in cranz da flurs e cun ghirlandas, l'uschenumnà «bostg da matg». A Cartigny ed ad Onex nettegian ils uffants il di avant il cortegi tut ils bigls da la vischnanca. En general vegn quest di da festa serrà cun ina marenda. Suenter che questa tradiziun è vegnida scumandada da Calvin il 16^avel tschientaner, è ella puspè vegnida revitalisada il 19^avel tschientaner. Silsuenter è ella sa derasada en spezial grazia a l'ierta dad Emile Jaques Dalcroze e da l'engaschament da Henri Samuel Aubert, che ha presidià la vischnanca da Cartigny il cumenzament dal 20^avel tschientaner. Ins sto però punctuar che questa festa è restada cleramain pli viva en las vischnancas praticamain tuttas catolicas ch'èn entradas al chantun Genevra en il rom dal Contract da Turin l'onn 1816 ditg suenter il domini da Calvin.