Il suentermezdi da l’emprima sonda da favrer sa scuntran las scolaras ed ils scolars pli vegls sin la plazza a Scuol Sot per far l’«Hom Strom» (um-strom). Els mettan ina stanga da telefon veglia da circa 8 meters lunghezza sin dus chavals da lain. Els fan duas cuas lungas e grossas da strom da seghel che vegn semnà aposta per quest intent e racoltà l’atun a maun. Quellas duas cuas vegnan fermadas a las duas fins da la stanga e plegadas spessamain enturn la stanga, fin che la zulla ha in diameter da var dus meters. L’Hom Strom vegn transportà cun in char fin a la plazza sin in prà ordaifer il vitg. Là mettan commembers dal cussegl da scola e dal cussegl communal l’um-strom cun agid da stgalas en ina fora preparada e lura en pe. Ussa sto el vegnir surveglià, per ch’ils mats dal vitg vischin n’envidian betg el anticipadamain.
La saira sa radunan la populaziun da Scuol cun ulteriurs giasts enturn l’Hom Strom, entant ch’ils scolars ils pli vegls sclereschan la cuntrada cun lur «bombas» (ballas da fieu) fatgas or da sdratschs bagnads en petroli. Punct a las 20.00 vegn l’um-strom envidà, e tuts chantan la chanzun da l’Hom Strom ch’il poet indigen Men Rauch ha cumponì per questa occurrenza.
