In’excursiun da la scienza natirala è in viadi lung in itinerari che permetta da far observaziuns areguard il mund fisic e/u vivent. Schegea ch’ella è derasada en Svizra, ha ella a Neuchâtel in caracter particular en connex cun l’instrucziun da las scienzas natiralas che stabilescha en virtid dal barat social e communitar la pratica d’excursiuns en gruppa.
L’enragischaziun istorica da las excursiuns da la scienza natirala en gruppas va enavos en il 18avel tschientaner e sa mantegna en particular cun l’arriv da Jean-Jacques Rousseau en la Val-de-Travers, nua ch’il filosof sa deditgescha a sia passiun per la botanica. Dapi la fundaziun dal «Club jurassien» 1865, dad «Amici Naturae» 1893 e da «Nos Oiseaux» 1913 daventa questa pratica ina tradiziun grazia a numerusas autras associaziuns. Dapi la creaziun d’in curtin botanic academic a Neuchâtel ils onns 1880 mainan ils professurs lur studentas e students sin excursiuns. Questa tradiziun s’augmenta enturn ils onns 1960 tras la creaziun da pliras professuras da botanica e zoologia a l’Universitad da Neuchâtel ch’è renconuschida en tut la Svizra per sia furmaziun en biologia dal terren. La tradiziun è sa mantegnida il 21avel tschientaner cun varga 20 associaziuns, da las qualas insaquantas èn vegnidas fundadas ils ultims 30 onns (ADAJE 1992, Sorbus 2004, Floraneuch 2015).
L’excursiun da la scienza natirala en gruppas è ina pussaivladad per il barat ed enritgiment da la savida. A nivel social han l’interess ed il quità communabel per la natira permess d’includer bainbaud la protecziun da quella. Las enconuschientschas relativas permettan da furmar activitads d’intermediaziun da la savida, numnadamain tras instituziuns musealas e chasas edituras da renum.
