Dapi passa 1500 onns celebrescha il convent dals canonis da l'Abazia da Saint-Maurice en il Vallais il cult da las reliquias dals martirs a Saint-Maurice d'Agaune. L'Abazia è vegnida fundada l'onn 515 cun la finamira da salvar la confessiun da cretta da son Murezzan e da ses camarats da la legiun tebaica, che duain esser vegnids executads en questa regiun. Fin oz han ils canonis l'incumbensa da mantegnair il cult da las reliquias e da las render accessiblas a persunas laicas da derivanzas fitg differentas. Las festas liturgicas quotidianas che las persunas cartentas pon visitar, la conservaziun e la valurisaziun dals objects dal stgazi da l'Abazia, la recepziun dals pelegrins e la processiun cun las reliquias il di da son Murezzan (22 da settember) furman ils elements da questa tradiziun.
La festa annuala è la manifestaziun la pli visibla e la pli populara dal cult. La processiun è il punct culminant da la festa. Las stgaffas da reliquias dal stgazi da l'Abazia vegnan purtadas sin il dies dals umens tras las vias da la citad. Plirs tschient persunas participeschan a la processiun (il convent dals canonis, spirituals da la Svizra e da l'exteriur, represchentants d'autoritads, chapellas da musica, gruppas da laics ed auters). La festa ha ina ferma dimensiun sociala (cun ina bavarella ed in gentar cuminaivel, cun ina fiera e cun differentas occurrenzas da divertiment). Ella è in mument impurtant da la vita da cuminanza a Saint-Maurice e dat perditga da l'attaschadadad da la populaziun a la tradiziun dal cult da las reliquias ch'è collià inseparablamain cun l'identitad da la citad.
