Il diever da la forza idraulica è in element impurtant dal svilup economic e social da la Svizra. Il Vallais, il pli grond producent d’energia idraulica dal pajais, ha sviluppà in’expertisa particulara en questa domena e dat gronda paisa al mantegniment da la savida colliada a quella, numnadamain la savida actuala dal persunal da manaschi e d’inschigneras ed inschigners dal sectur da la forza idraulica sco era la savida tradiziunala da mulineras e muliners. Las acturas ed ils acturs da quest sectur mantegnan ina ferma dinamica da scolaziun e perscrutaziun per garantir la durabladad ed il svilup da l’expertisa.
Il mantegniment e la controlla d’ovras idraulicas pretendan enconuschientschas e savida specificas. Malgrà che spezialistas e spezialists d’ovras idraulicas – mulineras e muliners/gestiunarias e gestiunaris da mirs da serra – ageschan en contexts zunt differents, mantegnan els tuts la tschiffada ed il provediment d’aua, controlleschan la quantitad d’aua e garanteschan il mantegniment da las ovras. La savida tecnica necessaria e las enconuschientschas da l’ambient natiral dals implants vegnan intermediadas empiricamain da generaziun a generaziun, e quai tegnend quint dals svilups economics, legislativs e tecnics. En la domena da la forza idraulica ha l’intermediaziun intergeneraziunala er in’impurtanza particulara al stgalim da las inschigneras e dals inschigners.
