Pumicultura ed elavuraziun da la fritga

Il chantun Turgovia, numnà er «Mostindien», è il chantun da pumicultura ed en spezial il producent da maila il pli impurtant da la Svizra. Mintga terz mail che vegn mangià en Svizra e quasi la mesadad da la maila en Svizra che vegn elavurada industrialmain a suc derivan dal chantun Turgovia. Pliras grondas mostarias han lur domicil en la Turgovia. Responsabels per la pumicultura en la Turgovia èn quasi exclusivamain manaschis purils da famiglia. La racolta da la bostga bassa vegn duvrada en emprima lingia per la producziun da fritgs da maisa, quella dals pumers auts tradiziunals per l'agen diever u per l'ulteriura elavuraziun industriala. La bostga auta che dominava ina giada la cuntrada,  surtut en il sidost dal chantun , è vegnida remplazzada ils onns 1950 da bostga bassa. Spezial per la Turgovia è stà che la bostga auta vegniva plantada per motivs climatics als puncts culminants dals ers auts. Schebain che blers bostgs auts è vegnids runcads, scuntran ins anc oz en blers lieus questa furma tipica d'emplantaziun.

Artisanat tradiziunal