«Bechtelistag Frauenfeld»

En la citad da Frauenfeld vegn festivà il terz glindesdi dal schaner il firà da Bumaun, il «Bechtelistag». Quest usit va enavos fin al temp medieval. Curt suenter la fundaziun da Frauenfeld la mesadad dal 13avel tschientaner èn sa scuntrads regularmain ils nobels ed ils burgais signurils en l'atgna ustaria per conversar e per sa divertir da cumpagnia. Els sa numnavan la Societad dals Constabels («Konstablergesellschaft»). L'onn 1430 èn er ils mastergnants s'unids ad ina societad che purtava il num «Zum wilden Mann» e che manava in'atgna ustaria. Questas duas societads han fusiunà l'onn 1640. Questa nova societad disponiva d'agens bains, concediva credits ed incassava tschains. Il cumenzament da l'onn sa scuntravan ses commembers per preschentar il quint e festegiavan cun in past cuminaivel e cun ina girunda. La tradiziun è vegnida cuntinuada a partir da l'onn 1811 cun in past cun salsiz, paun e vin ed è sa mantegnida fin al di dad oz. Quest past cumenza mintgamai precis las sis la saira en la chasa communala, la ceremonia ha lieu tenor reglas fixas e vegn accumpagnada da pleds festivs e da represchentaziuns musicalas. Suenter il past, vers las 23.00h, vegnan avertas las portas da la chasa communala per la glieud da mintga vegliadetgna e da mintga schlattaina che ha gust da far festa. Suenter mesanotg vegnan premiadas las meglras mascras da las persunas travestgidas. La gronda part dals restaurants da Frauenfeld resta averta la notg per che tuttas e tuts – oravant tut la giuventetgna – possian festegiar daried. Per bleras e per blers da Frauenfeld è questa notg numnadamain la notg da las notgs.