Groppenfasnacht – Tschaiver da rambots

La «Groppenfasnacht» – il Tschaiver da rambots (ina spezia da peschs) – è in usit che cumbinescha la pestga, la primavaira ed il tschaiver e che ha lieu sco ultima occurrenza da tschaiver en Svizra trais emnas avant Pasca. Il punct culminant è il cortegi da rambots che ha lieu mintga trais onns. Var 1200 persunas participadas tiran tras las vias e delecteschan 15'000 aspectaturas ed aspectaturs. Manà vegn il cortegi d'ina reproducziun surdimensiunada d'in rambot. Alura suondan gruppas tradiziunalas da pestgaders, motivs da primavaira, figuras da paraulas, gruppas e musicas da tschaiver. Durant il cortegi vegnan repartids als visitaders baccunets da pesch e vin alv da la regiun. Il cortegi fa part d'ina festa populara da plirs dis cun ina sairada da tschaiver dal vitg, cun in tschaiver d'ustarias e cun in bal da lumpas. Pliras legendas curseschan oz davart la naschientscha da questa occurrenza. La pli probabla para dad esser quella ch'il Tschaiver da rambots deriva d'ina festa da primavaira dals pestgaders dad Ermatingen. Ermatingen ha ina tradiziun da pestgaders che tanscha lunsch enavos – sco strusch in auter vitg en Svizra. Impurtanta era cunzunt la pestga da bondellins. Las raits da pestga e las bartgas nairas a funs plat vegnivan designadas sco «Segi», ed ils pestgaders vegnivan numnads «Segimanne». Questa pestga tradiziunala è dentant svanida ad Ermatingen.