«Fabrique»

«Visitai il quartier da Saint-Gervais, nua che l'industria d'uras da l'entira Europa para dad esser unida!» Uschia resumescha Rousseau las particularitads da la fabrica da Genevra en sia brev a d'Alembert. Cun la noziun «Fabrique» vegnan designadas dapi il 18^avel tschientaner las abilitads unidas da l'art d'urer, d'aurer e da giuvelier sco er da professiuns parentadas da l'elavuraziun da metals prezius. Las enconuschientschas cumpiglian tant il dissegnar, il gravar, las lavurs da guilloche e d'emagl sco er la producziun da lantschettas, da pennas, da spiralas, da capslas, da chadainas, d'etuis e da truclettas – insumma, l'eleganza da l'art d'urer en tut sia finezza.

Il quartier da Saint-Gervais è il center da questas activitads pulsantas. Tenor ina repartiziun exacta da la lavur surpiglian ils differents ateliers la successiun da las lavurs da detagl ch'èn indispensablas per la bellezza e per la qualitad dal product final. Da questa diversitad da lavurs manualas e da las enconuschientschas colliadas cun quellas èn resultadas bleras tecnicas da producir e da decorar tipicas per la regiun – per exempel l'emagl da Genevra («Émaux de Genève»), las cullas da Genevra («Boules de Genève») u il sigil da Genevra («Poinçon de Genève»). Ellas èn tuttas il fritg d'ina ritgezza da fantasia che caracterisescha fin oz la gronda reputaziun da Genevra en l'industria d'uras da luxus.