Inschign dals urers*

*Integrada en la glista represchentativa dal patrimoni cultural immaterial da l'UNESCO

Maletg 1 /

‹ › ×

I n'è nagin secret: La fabricaziun d'uras ha influenzà fermamain il svilup da l'artisanat, da l'industria e da la societad da l'artg giurassian. A partir dal 18avel tschientaner è l'industria d'uras ch'è sa furmada a Genevra vegnida transferida en regiuns pauc populadas sco la Vallée de Joux ed il Giura neuchâtelais. Entant che la producziun sa basava l'emprim sin il princip da montar cumponentas cumpradas («ètablissage»), èn silsuenter – sut la pressiun da fabricas americanas – vegnidas endrizzadas er en Svizra fabricas da producziun standardisada. Parallelamain èn naschidas las emprimas grondas scolas d'urers. Il 20avel tschientaner è il svilup da l'industria d'uras svizra – da la realisaziun d'in cartel, sustegnì da las bancas e da la lescha, fin a l'installaziun da gronds concerns d'uras – caracterisà da duas crisas successivas. En las valladas dal Giura ha il svilup da la fabricaziun d'uras prendì ina via speziala: malgrà ch'il model da producziun american è sa derasà praticamain en tut la Svizra, è la producziun fragmentada d'uras restada mantegnida en il Giura. E schizunt pitschnas manufacturas independentas han pudì surviver. Ils numerus manaschis pitschens creeschan ina gronda valur ed èn oz in factur indispensabel per la fabricaziun d'uras da luxus, cun las qualas la Svizra ha acquistà sia reputaziun excellenta e mundiala en quest sectur. La precisiun extraordinaria ch’è necessaria en il sectur da la fabricaziun d'uras e las cumpetenzas ed abilitads unicas dals urers permettan ozendi al marketing da l'industria d'uras da colliar cun las uras svizras in image spezial che sa basa sin luxus e sin qualitad d'emprima classa.