La fin dal 18avel tschientaner ha il chantun Glaruna survegnì in trist renum: Dal 1781 ha gì lieu en il chantun in dals ultims process da strias en Europa. Ina premissa per questa tragedia è stà la structura sociala dominada da famiglias oligarchicas ch‘empruvavan da restabilir lur influenza diminuenta cun in cas da dretgira spectacular. Lur agir è vegnì sustegnì d'ina maschaida da superstiziun e da scleriment che ha chattà ina gronda resonanza en la populaziun. Quest eveniment ha gidà a sviluppar la noziun dal «omicidi giudizial» che vegn duvrada dapi lura per mintga furma d'in omicidi en num dal despotissem. Ina vasta recepziun ha quest «affar Göldi» cuntanschì cun la publicaziun dal roman dad Eveline Hasler l'onn 1982. L'onn 2007 è vegnì avert a Mollis il Museum Anna Göldi che sa deditgescha a l'istorgia da la «ultima stria». Quant ferm che questa sentenzia malgista è anc adina francada en la conscienza da las Glarunaisas e dals Glarunais mussan la reabilitaziun uffiziala dad Anna Göldi l'onn 2008 u las activitads da la Fundaziun Anna Göldi che onurescha dapi l'onn 2009 mintga dus onns ina persunalitad cun il Premi dals dretgs umans Anna Göldi.
En la Chasa Zwicky a Mollis ha Anna Göldi lavurà ils onns 1768 fin 1774. Qua ha ella er gì ina relaziun d'amur cun il figl dal patrun Melchior Zwicky © Klara Hübner, 2011
Er Glaruna ha ina via Anna Göldi: Tras questa giassa è Anna Göldi ida a sia execuziun ils 13 da zercladur 1782 © Heinrich Speich, 2011
Quant resta d'ina vita umana?: chascha 1 da las actas Göldi en l'Archiv dal stadi dal chantun Glaruna © © Heinrich Speich, 2011
Nua che Anna Göldi ha laschà sia vita ils 13 da zercladur 1782, stat ozendi tranter auter ina chasa da maz © Heinrich Speich, 2011
Il Museum Anna Göldi avert dal 2017 en il Hänggiturm a Ennenda. © Anna-Göldi-Stiftung
Vista da l’exposiziun permanenta en il Museum Anna Göldi. © Anna-Göldi-Stiftung
Descripziun detagliada
Anna Göldi (PDF, 364 kB, 19.09.2024)Ausführliche Beschreibung
Sparta
Chantun
Contact
Anna Göldi Museum
Anna Göldi Stiftung