Al Banntag chaminan ils burgais per lung dals cunfins communals. A Liestal, en la chapitala dal chantun Basilea-Champagna, vegn questa occurrenza organisada da la vischnanca burgaisa. Il Banntag ha lieu il glindesdi avant Ascensiun e vegn festivà mo dad umens e d'uffants. Tut tenor il quartier d'abitar e tenor l'appartegnientscha famigliara èn ils burgais dividids en quatter gruppas (Rotten). Mintga gruppa suttastat ad in schef, ha in'atgna bandiera ed in'atgna musica e vegn accumpagnada da la gruppa d'uffants.
Il Banntag cumenza la damaun a las 06.00 cun il sajettar dals tiradurs dal Banntag en la Rathausstrasse. Lura convochescha il zain da la porta da la citad ils burgais da Liestal. A las 08.00 cumenzan las quatter gruppas a chaminar. En viadi sajettan ils tiradurs dal Banntag adina puspè en l'aria. Ensemen vegnan percurrids ils cunfins communals d'ina lunghezza da 26 kilometers. Tranteren datti duas pausas cun pleds e cun in appel, sco er ina u pliras fermadas en ustarias u en vischnancas vischinas. Vers saira returnan las gruppas a Liestal. Là van ins ensemen per las ustarias da la citad.
