Guarir cun urar

Guarir cun urar signifitga il dun da guarir in uman cun urar davent sia malsogna. En quest connex sa tracti d'ina pratica fitg veglia che va enavos sin l'antica cristiana u forsa anc pli lunsch. Cun agid da versets curativs e da furmlas da benedicziun pussibilitescha il guarir cun urar da curar u da mitigiar in grond dumber da malsognas e da plajas sco arsas, aftas, variclas, anghina e mal il chau sco er tscherts disturbis psichics. La particularitad da quest gener da tractament – che po vegnir fatg sur terzas persunas e che po er vegnir applitgà per animals – è oravant tut quella ch'i n'è betg necessari da far manipulaziuns vi dal pazient e ch'i na dovra er betg in contact direct cun la persuna tractada. En las chasas da tgira ed en ils ospitals svizzers datti numerusas glistas cun numers da telefon da guaridras e da guariders, ordinads tenor las malsognas che pon vegnir tractadas. Ils versets curativs vegnan tradids a bucca sco confidenza persunala, en la gronda part dals cas ad ina persuna da la proxima generaziun. Il guarir cun urar è en emprima lingia in act da cumpassiun e da pietusadad che sto vegnir exequì gratuitamain. Las raras emprovas da profitar da quest dun chaschunan perquai adina ina gronda indignaziun. En il Giura è il guarir cun urar ina tradiziun fitg viva; questa pratica datti dentant er en auters chantuns sco Friburg, Vallais ed Appenzell ed en la Svizra centrala. En Svizra franzosa e taliana è questa tradiziun generalmain derasada pli fitg ch'en Svizra tudestga. Senza federaziun u organisaziun da tetg è il guarir cun urar in agen univers senza reclama, senza pensar economic e senza tschertga da gloria e d’onur. In misteri cun ina forza che na po betg vegnir exprimida cun pleds e che surpassa il pensar raziunal da noss temp.